قلتله ثائر مركوب !!
جديدة دي ..

إعادة لنشر بوست من ٢٠١٣

من يُسموّن بثوار يناير يقولون :
اه في ثورة مجيدة على الاستبداد والقمع اللي كنا عايشين فيه .. بس مكملتش عشان الاخوان خطفوها وركبوها ..

طب سؤالي أنا أحمد عبد العزيز : وكالعادة ( بالمنطق ) .. 
هو انت مش عملت ثورة جبارة وكسرت قيود أمن الدولة وتغلبت على منطومة أمنية مصرية وأجبرت رئيس الدولة على التنحي وكسرت الشرطة و و و .. طب اللي يعرف يعمل كل ده يا راجل ما يعرفش يعمله مع الاخوان وهو شايفهم بيركبوا ويخطفوا ثورته الطاهرة النقية التلقائية ؟؟؟!!! 

يعني انت عرفت تعملها مع منظومة أمنية مصرية راسخة ورئاسة وشرطة و و و ..  ومعرفتش تعملها مع الإخوان ؟؟!!!!

عبيد البيادة الإيراني .. عبيد البيادة التركي .. عبيد البيادة الأمريكي .. هما اللي عملوا ٢٥ يناير ..

بالنسبة للشباب اللي نزلوا في ٢٥ يناير .. مش ذنبي ان انت اتضحك عليك واتوجهت من خلال الاعلام والافلام والمسلسلات ومن ناس متآمرة بتلاقيها جنبك في القهوة والشغل والنادي وظيفتها توجيهك شعوريا ولا شعوريا عشان تكون كوبري يعدي عليه أعداء مصر .. مش معنى انك نزلت ومصدق فعلا ان مصر فقيرة وأمن الدولة مستبد واننا كنا عايشين يا عيني مفيش حرية وماشيين في الشارع خايفين يتقبض علينا من أمن الدولة المستبد .. مش معنى انك كنت مصدق فعلا تبقى ثورة .. 

عزيزى الشاب الثورجى :
لو كنت نازل يوم ٢٥ يناير علشان تعمل ثورة تاني على مصر وتشيل الرئيس السيسي زى ما شلت مبارك يبقى لازم تعمل حسابك فى شوية حاجات :

أولا: تعمل حسابك إن السجون تتفتح فى نفس الوقت والاقسام تحرق فى نفس الوقت. 

ثانيا : تعمل حسابك إن مقرات أمن الدوله يتم اقتحامها فى نفس الوقت وكل ده فى يوم واحد وكل دي حجات نفذتها اجهزة مخابرات خارجية بالاشتراك مع الاخوان للإطاحة بمصر .. مش انت اللي نفذتها يا عزيزي الشاب الثوري .. لأنك بتقول إنك سِلمي سِلمي .. مش انت سلمي برده؟؟

لو عندك كل ده ٠٠٠٠ عالبركه ٠٠٠٠٠ لكن لو حضرتك مفكر انك لما نزلت وقعدت فى التحرير ١٨ يوم تغنى وترسم جرافيتى وتشتم فى مبارك وهو ده اللى خلى مبارك يتنحى ٠٠٠٠٠ يبقى قوم خد دش ساقع فى البرد ده علشان تفووووووووووووق وتعرف حجمك كويس و البس كتونيل . واعرف ان الاطاحة بنظام في دولة محتاج تجهيز من دول تحضرله وتصرف وتخطط واجهزة مخابرات.
واعرف ان انت مجرد كوبري وجسر صنعه الاعلام المصري  ومنى الشاذلي والابراشي والمسلماني والجزيرة اللي خلوك تكره القيادة وتكره الشرطة وتشتم الجيش .. قصدي الجيش قال يعني في فرق كان زمان المخابرات والشرطة والجيش فرموا الاخوان فرم وقضوا على المؤامرة اللي نهبت اقتصاد مصر وخلت بلدك مرتع للاختراقات الخارجية .. ومكنش كل ده حصل .. لكن حضرتك عزيزي الشاب الثوري شكلت ضغط هائل على القيادة والجيش والشرطة خليتهم يسيبو كل حاجة تحصل احسن ما البلد تتحرق بإيد حضرتك وبإيد قوى خارجية هتولع وتفجر وتحرق مع حضرتك وفي الآخر هما برة الموضوع وحضرتك اللي عملت ثورة .. ولما الدولة حاولت تلم الموضوع وترجعك بيتك عشان تلم المؤامرة حضرتك غضبت وثرت اكتر وولعت البلد .. ده اللي كان هيوصل للرأي العام العالمي .. ان المصريين عملوا ثورة.
عرفت بقى يا حبيبي مبارك تنحى ومصر سقطت ازاي .. مش بيك يا عزيزي الشاب الثوري ولكن بخطة ضد مصر كنت انت على مدار سنين احد اركانها من غير ما تحس .. وصنعوا منك كوبري وجسر.

وأخيرا .. هتقولي مش معنى إن في ناس خونة نزلت في ٢٥ يناير إنها تبقى مش ثورة ..
هقولك .. ومش معنى إن في ناس بريئة نزلت في ٢٥ يناير إنها مش مؤامرة ..