كشفت المذيعة أسماء مصطفى، تفاصيل جديدة حول إصابتها بالسرطان، وذلك من خلال منشور جديد عبر صفحتها الرسمية على فيس بوك.

وقالت أسماء خلال منشورها منذ قليل: «مساء الخيرات عليكم وتحياتى وشكرى لكل الناس الجميلة على الصفحة.. ردا على سؤال بتسأله كتير جدا. هو إن ليه مش بحكى تجربتى وتفاصيل المعركة مع المرض اللعين مع إن فى ناس كتير عملت كده وإن ده مهم علشان غيرى يستفيد».

وأضافت: «الاجابة ببساطة إنى طبعا مقتنعة ومدركة بأهمية إن مريض السرطان بيقدر يفيد غيره بتجربته وبيكون فعلا فيها امور كتيرة واحيانا معقدة جدا.. بس أنا ما زلت فى هذه المحنة وحتى الآن واللحظة معنديش جديد غير إنى منتظرة انى مع الفحص الجاى باذن الله آلاقى استجابة للعلاج وأكيد باذن الله لما ربنا يكتبلى الشفاء من عنده هطلع واقول واتكلم معاكم كتير نفسى أكون مفيدة فعلا للناس بس حاليا مينفعش».

وتابعت أسماء: «الحاجة الثانية زى ما وضحت قبل كده ده مرض ملوش كتالوج فى ناس نفس حالتى وكانت ظروفهم افضل منى وفى العكس طبعا ..الشئ الأهم اللى هنصح بيه وبكرره مفيش حالة زى الثانية حتى لو كانت نفس الإصابة لأن جسمنا مش واحد ولا هنعانى نفس الأعراض ..لا أنواع السرطان واحدة ولا العلاجات واحدة ولا الأجسام واحدة ..علشان كده بلاش تبادل خبرات الأدوية لان دى يحددها الطبيب المختص فقط حسب كل شخص».

واستكملت: «وفى حالات معقدة زى حالاتى بتاخد أكثر من نوع علاج كيماوي مع بعض وكل شوية تعديل رجاء نخلى بالنا نتوكل على الله وناخد بالأسباب وربنا كريم. وان شاء الله اقابلكم على خير وبعتذر على الايف فى الظروف الحالية صعب لأنى عاوزاكم تشوفوني كويسة وده نقطة تانية اكيد هنتكلم بردوا عنها وهى نظرة الآخرين لمريض السرطان بعد ما المرض والكيماوي يفترسوه وربنا يهونها من عنده».